Томислав Јотовски имаше одличен старт на фјучр турнирот во Хамамет, Тунис, вреден 15.000 американски долари. Во првото коло нашиот најдобар машки тенисер го победи домашниот претставник Јусеф Дабаби со 6:2, 6:1 во гејмови.
Томи не дозволи никакво изненадување од страна на противникот, кој на турнирот настапи со добиена вајлд карта.
Во второто коло, Томи ќе се соочи со Бразилецот Никола Сантош, кој е осми носител на овој фјучр турнир.
Покрај Јотовски, на овој турнир настапува и Шендрит Деари, кој денеска, во првото коло ќе се соочи со седмиот носител, Шпанецот Пол Толедо Баге.
Нашата најдобра тенисерка, Лина Ѓорческа, пак, како втора носителка од денеска ќе се активира на фјучр турнирот во Санта Маргерита Ди Пула во Италија. За Лина ова е прв турнир по повредата на дланката, а на самиот старт ќе се соочи со Украинката Катарина Заватска која својот пласман во главниот турнир го избори преку квалификациите.
Наградниот фонд на овој турнир изнесува 25.000 американски долари додека, победникот на своето конто ќе додаде нови 50 ВТА поени.