Најдобрите македонски тенисери, Лина Ѓорческа и Томислав Јотовски бележат одлични настапи на фјучрс турнирите во Швајцарија, односно Турција.
Ѓорческа која е активна на натпреварувањето во Кијасо, вредно 25 илјади американски долари, се пласираше во самата завршница од двете конкуренции и се надева одличните настапи може да ги потврди со титула.
Во поединечната конкуренција, нашиот рекет ќе игра во четврт-финалето откако вчера ја совлада домашната тенисерка Клара Грим со 6:2, 6:3. Противник во наредната фаза ќе и биде Катинка вон Дихман од Лихтенштајн.
Кога станува збор за настапите во дубл, Македонката игра заедно со Александра Најденова од Бугарија, каде што и таму бележи одлични резултати. Обезбеден е пласман во полуфиналето откако вчера беа подобри од домашниот пар Ин Албон и Кенел со 6:3, 6:2. За пласман во финалето и борба за титулата, Лина и Александра ќе се соочат со Миртил Жорж од Франција и Тес Суњо од Швајцарија.
ЈОТОВСКИ БЕЗ МАКА ВО ДУБЛ
Томислав Јотовски и Вадим Алексенко се пласираа во полуфиналето во конкуренција на двојки на фјучр турнирот во Анталија, Турција. Нашиот најдобар машки тенисер и партнерот од Украина играат одличен турнир.
По елиминацијата на првите носители, Томи и Вадим во четврт-финалето го збришаа романскиот пар Сорин Јорданче и Калин Манда со 6:1, 6:0.
Во наредната, полуфинална фаза ќе играат против домашниот пар кои воедно се и трети носители Сарп Агабигун и Атуг Чаликбилек.
Наградниот фонд на овој турнир изнесува 10 илјади американски долари, додека победниците ќе добијат 10 нови АТП поени.