Вардар вчера отпатува кон Германија каде што во сабота ќе го одигра првиот 1/4 финален натпревар од Лигата на шампионите.
Македонскиот претставник ќе гостува во Флензбург, град на северот на Германија, а патешествието го почна со лет кон Хамбург преку Виена. Велиме патешествие, затоа што црвен-црните заглавија на аеродромот во Виена. Поради дефект на авионот, летот доцнеше повеќе од два часа.
Натпреварот со Флензбург е закажан за во сабота од 17:30, па Вардар направи добар избор што одбра ден порано да тргне за Германија, па ќе има време да се аклиматизира и одмори пред средбата.
Во меѓувреме, Флензбург изби на првото место во Бундес лигата, откако успеа да го спречи Бергишер на Аце Јоновски двете победи по ред да ги претвори во серија. Флензбург победи 32:25 (16:16), и сега е на првото место со бод повеќе, но и натпревар повеќе од Рајн Некар. Од трката за шампионската титула неделава испадна Кил кој на домашен терен одигра нерешено со Минден и сега има натпревар повеќе од Флензбург и три бода помалку.