Ракометарките на ЖРК Вардар, по една недела одмор, по исцрпниот Ф4-викенд во Лигата на шампионите, одново се враќаат во строј. Случувањата во најсилното европско клупско натпреварување „црвено-црните“ ги оставаат зад себе и сега треба да се насочат кон главниот фронт, домашното првенство и Купот, за да може следната сезона уште посилни да се вратат на европската сцена.
Вардарки ја имаат улогата на апсолутен фаворит на домашната сцена, но сите се свесни дека тоа е дел од обврските што мора да се одработат професионално и до крај.
Прво на агендата им е завршницата во Купот, која се игра веќе в петок и в сабота, во салата „Автокоманда“ во Скопје. Вардар во полуфиналето за противник ќе го има тимот на Гевгелија, додека во финалето би ја бранел титулата од подобриот меѓу Металург и Прилеп.
Што се однесува до првенствените дуели, и таму „црвено-црните“ дами ќе ги решаваат дилемите на Ф4. Односно според пропозициите, вардарки ќе почекаат да заврши регуларниот дел од првенството (уште едно коло до крајот) пред да ја пречекаат конкуренцијата, односно трите најдобри на табелата.
До крајот на месецов, екипата ќе ги комплетира сите обврски пред да следува периодот на пауза и на реструктуирање на редовите, со оглед на тоа дека голем број ракометарки од актуелниот состав ќе го напуштат македонскиот првак.