Навивачите на Вардар, сепак, ќе мора да го почекаат стартот на сезоната за да може во живо да ги следат настапите на европскиот првак Вардар, откако вчера клубот и официјално потврди дека најавениот „Вардар трофеј“ за средината на август е откажан. Освојувањето на шампионската титула во Лигата на шампионите носи директно учество на ИХФ Супер глоуб, неофицијалното светско клупско првенство во Доха (25 – 28 август), што ги принуди „црвено-црните“ да направат сериозни турбуленции во својот подготвителен план.
Јасно е дека Супер глоуб е приоритет, па „Вардар трофеј“ падна во втор план, односно откако екипите учеснички што требаше да бидат дел од него, имаа разбирање за ситуацијата во која се најде Вардар, тој е откажан.
Ова е втор настан од августовската агенда на вардарци кој е откажан поради Супер глоуб, откако претходно македонскиот првак се повлече и од учеството на јубилејниот турнир на Веспрем, кој е во ист термин како и настапот во Доха.
Вардар ќе настапи на турнир во Гумерзбах од 11 до 14 август, а потоа за подобра аклиматизација за Катар ќе замине на 22 август, односно три дена пред почетокот на Супер глоуб.
Во Доха, покрај Вардар, ќе играат и Фуксе Берлин како актуелен победник, Ал Ахли (првак на Африка), Сиднеј Уни (првак на Океанија) и Пињериос (освојувач на Панамериканските игри). Вајлд картата што ја доделува ИХФ, најверојатно, ќе оди во рацете на ПСЖ, европскиот клупски вицепрвак, додека под прашалник се домашните претставници, како и азиските клубови со оглед на тоа дека од политички причини, дел од земјите ги прекинаа врските со Катар.