Најдобрата македонска тенисерка, Лина Ѓорческа, имаше пад за десет места на светската ВТА-листа и сега е на позицијата број 180 на ранг-листата на најдобри тенисерки на планетата. Во двојки, таа имаше назадување за 12 места, и сега е 128-ма.
Од македонските тенисерки на ВТА-листата, фигурира и Магдалена Стоилковска, која неделава ќе биде на 1.223. место во сингл, напредок за две места во однос на претходното рангирање. Во двојки, таа е на 1.269. место.
Кај мажите, нашите претставници имаа напредок. Нашиот рекет број 1, Томислав Јотовски, сега е на 759. место, напредок за девет места во однос на минатата недела. Димитар Грабул влезе меѓу најдобрите 1.000 и сега е на делба на 999. место. Горазд Србљак е 1.170-ми, што е напредок за две места, а Стефан Мицов неделава за 17 позиции го подобри својот ранг и сега е на делба на 2.037. место.
Во машки дубл, Јотовски е на 592. место, плус од пет позиции за разлика од минатата недела и тој е единствениот наш тенисер кој е во топ 1.000 во двојки. На листата ги има и Предраг Русевски (1.362.), Мицов (1.601.) и Србљак (1.614.).