Наместо три сета до 25 поени, одбојкарскиот натпревар ќе се игра во четири добиени сета до 15 поени, според новите правила што размислува да ги воведе Светската одбојкарска федерација (ФИВБ). Интернационалната куќа на одбојката ќе ја тестира ваквата радикална промена на изгледот на одбојката летово, на светските првенства У23 во машка и во женска конкуренција.
Покрај оваа промена, и две други правила ќе бидат ставени на тест. Првото е дека играчот што сервира во скок, ќе мора да го заврши доскокот пред линијата за сервис (нема да смее, како досега, да доскокне во полето за игра) и второто е дека играчот што ќе напаѓа од „втора линија“, ќе мора да го направи доскокот пред линијата од три метри. Се смета дека со промената на овие долгогодишни правила, ќе ѝ се олесни работата на одбраната. Исто така, би требало да ги направи поените подолги, а со тоа и траењето на натпреварите и покрај тоа што наместо досегашните 75 неопходни поени за победа (во случај на добиени три сета по 25 поени), во иднина 60 поени ќе бидат доволни за победа (со освојување четири сета од 15 поени).