Математички, на одбојкарите им е потребна само една победа за да се најдат на финалниот турнир во Данска, а тоа може да го сторат веќе в петок, против Шведска
Веќе в петок машката одбојкарска репрезентација на Македонија може да се промовира во учесник на фајнл фор турнирот од Европската лига 2017, кој за 1 и 2 јули е закажан во Данска, а каде што, покрај домаќинот, учеството го потврди и Украина, како првопласиран тим од групата Б.
Математички, на одбојкарите им е потребна само една победа за да се најдат на завршницата, а со оглед на тоа дека е познат распоредот на противниците на Македонија за вториот турнир во Тирана, таквата позиција ќе се бара преку Шведска.
Единствениот ривал во групата А кој успеа да ни одземе сет во СЦР „Кале“ е екипата преку која тимот на Драгутин Балтиќ треба да го завери фајнл форот. Тој загубен сет беше предупредување за „спартанците“ дека немаат право да се опуштат и дека мора докрај да си ја завршат работата, иако покажаа дека се апсолутни фаворити за првото место.
Со дуелот меѓу Македонија и Шведска ќе биде отворен вториот турнир во Тирана, со оглед на тоа дека мечот се игра од 15 часот, додека од 18, организаторот Албанија го пречекува Азербејџан. Ден подоцна, „спартанците“, исто така, го играат првиот меч против Азербејџан, додека в недела од 18 часот, во дуел со домаќинот, го комплетираме настапот од групната фаза.
За разлика од Македонија која со три бода би била промовирана во Ф4-патник, сѐ уште стои отворено прашањето која селекција, како второпласирана, ќе се најде на финалниот турнир во Данска.
Одбојкарите денеска попладне ќе го одработат последниот тренинг, додека утре изутрина заминуваат за Тирана на аклиматизација на средината во кој в петок го започнуваат вториот викенд од Европската лига 2017.