Холандскиот ветеран Фери Вертман е победник на 10- километарската пливачка трка на отворени води на Светското првенство во Будимпешта. Олимпискиот шампион од Рио успеа да триумфира пред светскиот шампион, Американецот Џордан Вилимовски, за 0.10 секунди, и со тоа ги обедини златните медали од ОИ и од СП.
Пред две години на СП во Казан, Вертман заврши втор, зад Вилимовски, а овој пат беше подобар. Французинот Марк-Антоан Оливие го доби бронзениот медал.
Ова е првпат Холанѓанец да победи на 10- километарската трка на Светскиот шампионат, а среброто на Вертман од 2015 година беше единствениот медал за Холанѓаните на овие првенства.
„Ова беше силна трка. Противниците беа пред мене во поголемиот дел од трката, меѓутоа јас ја чував силата за финишот. Некои од нив почнаа да ’паѓаат’ на пет километри до целта и тогаш знаев дека морам да дадам сѐ од себе. Успеав и пресреќен сум поради тоа“, изјави Вертман, кој го презеде водството некаде на 250 метри од целта.