Четвртиот гренд слем турнир сезонава, полуларниот УС опен, ќе има награден фонд од 50 милиони американски долари, што претставува рекорд на турнирот. Победниците во машка и во женска конкуренција ќе инкасираат по 3,7 милиони долари, додека поразените во финалето - по 1,8 милиони долари. За победниците во двојки се предвидени по 675.000 долари, што, исто така, е највисока сума во историјата.
Од опен ерата, па досега, наградниот фонд на УС опен постојано расте. Во првата година од опен ерата, во 1968 година, за мажите и за жените била подготвена награда од 100.000 долари.
Во 1973 година, за првпат на турнирот била одредена идентична парична награда за победниците во машка и во женска конкуренција, чекор кој не бил направен на ниту еден друг гренд слем турнир до 2001 година.
Во 1981 година, првпат наградниот фонд достигнал 1 милион долари, а во 1983 година, тој бил двапати поголем. Во 1996 година, достигнал 10 милиони долари.
Во последните години, во 2007 тој достигнал 20 милиони, во 2013 изнесувал 30 милиони, а во 2015 - 40 милиони долари. Минатата година, УС опен понудил 46 милиони долари. Оваа година, сумата за награди достигна до 50 милиони долари.
Отвореното првенство на САД се игра од 28 август до 10 септември, а минатогодишни шампиони се Стен Вавринка во машка и Анџелик Кербер во женска конкуренција.