Домаќинот на мундијалот ќе биде противникот кој Македонија ќе треба да го помине во првата фаза од елиминациите доколку сака да се најде меѓу најдобрите осум селекции на светот.
Противникот кој се надеваа дека ќе го избегнат во елиминациите, организаторот Алжир ќе биде ривалот на Македонија во осминафиналната фаза на Светското првенство У21. Домашните ракометари во последниот натревар од групната фаза ја совладаа Саудиска Арабија со 23:21 (10:11) и се сместија на третата позиција на табелата во групата Д, со што потврдија дека во продолжението вкрстуваат со нашите ракометари кои по триумфот над Бразил, се најдоа на второто место во групата Ц.
Македонските репрезентативци ќе мора да го елиминираат организаторот доколку сакаат да го продолжат мундијалскиот сон и да се најдат во четвртфиналето, што ќе биде исклучително тешка задача.
Осминафиналните натпревари на програмата се в среда, а Македонија и Алжир играат во последниот термин од 21:45 часот по македонско време.