Кенија ќе се кандидира за домаќин на Светското првенство во атлетика во 2023 година откако имаше две успешни интернационални натпреварувања во последните 10 години. Ниту една африканска нација досега не била организатор на СП во атлетика, но кенискиот министер за спорт, Хасан Варио, вели дека тие покажале дека се способни за големи натпреварувања по одржувањето на СП под 18 години во Најроби, во јуни.
„Покажавме дека сме способни за помали натпреварувања, и сега дојде време за големи натпреварувања. Кенија стана првата африканска нација која била најдобра на едно СП, во Пекинг во 2015 и би било совршено да сме првата нација со СП во атлетика. Имаме план за изградба на три големи стадиони во Најроби, Момбаса и во Елдорет и седум помали во другите градови“, изјави Варио при пречекот на кениските атлетичари, кои беа втори, зад САД, на првенството во Лондон.
Следното СП се одржува во Доха, Катар, во 2019 година, пред американскиот атлетски центар Јуџин во Орегон да биде домаќин на СП во 2021 година.