Ракометната федерација на Македонија минатата сезона го стави во пропозициите одигрувањето на Супер купот, а истиот премиерата ќе ја доживее на почетокот на оваа. Со оглед на тоа дека Вардар е носител на двојната круна, одлучено е Вардар како шампион и Еурофарм Работник, како финалист од Купот на Македонија да се сретнат во премиерното издание на Супер купот.
Тоа всушност ќе претставува реприза на финалето на Купот на Македонија, кој се играше во салата „Младост“ во Битола, а во кој „црвено-црните“ ја оправдаа улогата на апсолутни фаворити и го кренаа пехарот.
Истиот ќе се одигра на 12 септември (вторник) и ќе претставува вистинска увертира за почетокот на новото национално првенство закажан за четири дена подоцна, односно викендот 16/17 септември.
Она што останува непознато во моментов е локацијата на која би се одиграл натпреварот. Дали тоа ќе биде во СЦ „Јане Сандански“ во Скопје, или, пак, одново публиката во салата „Младост“ во Битола ќе биде сведок на еден дуел во кој овие два тима ќе се борат за пехар. Секако РФМ може да се одлучи и за неутрален терен.
Овој натпревар ќе дојде како дополнителна обврска во (пре)натрупаниот распоред на Вардар, кој в сабота ја отвара сезоната со дербито со Металург во СЕХА лигата, по што ќе следуваат регионалните натпревари со Горење и Мешков Брест, а на 17 септември во Висла европскиот првак ја започнува новата сезона во Лигата на шампионите.
За Еурофарм Работник, пак, дуел со Вардар ќе значи генерална проба пред обврските во Супер лигата и темпирањето на формата за европското деби во Челинџ купот.