IDIVIDI

вторник, 13.05.2008

IDIVIDI Мени

Спорт / Останати спортови

Македонија во 3. шешир

Женската јуниорска репрезентација на Македонија е рангирана во 3. шешир пред ждрепката за групите за Светското првенство кое треба да се одржи кај нас од 21 јули до 3 август.

Македонија дефинитивно ќе ги избегне во првата фаза репрезентациите на Аргентина, Казахстан и Унгарија бидејќи токму овие репрезентации се рангирани во истиот шешир каде што е и нашиот најдобар јуниорски состав.

Сепак, рангирањето нуди можност за игра против неколку атрактивни селекции, но и неколку состави против кои не би требало да имаме поголеми проблеми.

Она што е најважно за нас е фактот што како домаќини нашиот шешир влегува во ждрепка дури откако групите ќе бидат речиси формирани.

Прво ќе бидат извлечени селекциите кои се наоѓаат во првиот и вториот шешир, но и оние кои се во последниот шешир во кој се наоѓаат вкупно осум селекции. Дури откако секоја од групите ќе добие по четири репрезентации ќе биде познато каде ќе игра Македонија.

Селекторот Георгиевски и тренерот Петрушевски ќе треба да ја изберат групата во која ќе игра нашата селекција, а практично и противниците со кои ќе можеме да дојдеме до повеќе бодови и добра позиција за игрите во вториот круг.

Инаку, сакаме ли успех на Светското првенство мораат сите девојки да ја сфатат задачата сериозно бидејќи ги очекува голем предизвик. Ова им е шанса на кариерата така што секоја од нив ќе мора да ја искористи и да покаже дека заслужува да го носи дресот со репрезентативните бои.

РАНГИРАЊЕ ПРЕД ЖДРЕПКА

1. ШЕШИР: Данска, Шпанија, Кореја, Романија

2. ШЕШИР: Хрватска, Франција, Словенија, Црна Гора

3. ШЕШИР: Македонија, Аргентина, Казахстан, Унгарија

4/5. ШЕШИР: Германија, Алжир, Ангола, Бразил, Јапонија, Тајпех, Уругвај, Океанија