IDIVIDI

среда, 14.05.2008

IDIVIDI Мени

Спорт / Останати спортови

Лазаров најдобар стрелец во ЛШ!
ЕХФ ја корегираше листата на стрелци и сега Лазаров и Стефансон имаат по 96 гола, но Лазаров има помалку голови постигнати од пенал и дури четири меча помалку од Исланѓанецот.

Кирил Лазаров е најдобриот стрелец во Лигата на шампионите сезонава. Европската ракометна федерација го призна голот на македонскиот интернационалец од дуелот Загреб-Вардар Про и сега тој има 96 гола, исто колку што постигна и Олафур Стефансон од шампионскиот тим на Сиудад Реал, но Македонецот има помалку голови од пенал и официјално е прв на листата на стрелците.

Имено, на тој натпревар еден гол место на Лазаров записничката маса го запишала на друг ракометар. Откако заврши финалето, и се виде дека со тој гол Лазаров би бил прв стрелец во ЛШ, Загреб испратил снимка во ЕХФ и по разгледувањето била констатирана грешката на записничката маса и голот му е запишан на вистинскиот стрелец. Гол кој го реши победникот во престижната трка за ласкавото признание.

Со ова е исправена неправдата која ќе му беше нанесена на Лазаров кој пред две години беше најдобар стрелец, лани во реваншот на финалето, откако одиграа четири натпревари повеќе го минаа Никола Карабатиќ и Ларс Кристијансен, а годинава исто со четири натпревари повеќе еден гол повеќе постигна Олафур Стрефансон.

Но, Европската ракометна федерација ја корегираше листата и сега Кирил Лазаров е најдобриот стрелец во Лигата на шампионите!

"Јас знаев за тој гол, но се надевав дека нема да има потреба да реагираме. Но, на крајот излезе неминовно, па реагираше клубот и грешката беше исправена. Што да кажам, пресреќен сум. Од сите признанија кои ги имам досега добиено, ова ми е можеби најдраго, затоа што до него дојдов најтешко. Ова не е само индивидуално, ова го сметам како признание за целиот македонски ракомет. Ова излезе добра сезона и најмногу од сe сакам да ја заокружиме со елиминација на прастарите должници - Исланд!", изјави Кирил Лазаров.

Вторпат за три години, од кои реално требаше да бидат три од три на листата на стрелци на врвното натпреварување е остварување какво што никогаш досега нема постигнато ниту еден македонски спортист во кој било спорт. Секоја чест за Лазаров, останува да чекаме во јуни на мечевите со Исланд, на кои ќе има можност очи во очи со Стефансон да докаже кој е најдобриот десен бек во светот во моментов.