IDIVIDI

среда, 30.07.2008

IDIVIDI Мени

Спорт / Останати спортови

МАКЕДОНИЈА РЕМИЗИРАШЕ НА ПРВИОТ МЕЧ ОД ПРЕЗИДЕНТ КУПОТ ВО ГЕВГЕЛИЈА
И Алжир не го победивме

Имавме добар почеток на средбата. Успеавме да поведеме со 2:1, но не го зачувавме водството долго време. Противникот дојде до нерешени 3:3 во 8 минута. Потоа се играше гол за гол, а Алжир првпат поведе во 15 минута од средбата кога на семафорот стоеше резултат од 9:8.

Од тој момент почна кризата во играта на репрезентацијата на Македонија. Се правеа грешки во нападот, се губеа топки и тоа не донесе до негатива од два гола, 9:11 во 16 минута.

После ова полека се фаќаше приклучок, а на еден гол негатива последен пат бевме во 22 минута при резултат од 11:12. Цели пет минути чекавме на следниот погодок, а за тоа време примивме нови три гола. Елена Георгиевска беше стрелец на последниот гол за Македонија при што намаливме на 12:15, а до крајот на првото полувреме не направивме ништо во наша корист бидејќи примивме уште два гола и на одмор заминавме со дури пет гола негатива, 12:17.

Почетокот на второто полувреме не донесе ништо ново. Продолживме во ист стил како што го завршивме првиот дел. Три минути се играше гол за гол и се одржуваше истата разлика.

Првпат успеавме да намалиме на четири гола дури во 42 минута од средбата. Во тие моменти водството на Алжир изнесуваше 20:16, па тоа беа моменти кои даваа некаква надеж за македонската репрезентација. Следуваа уште неколку квалитетни минути во кои успеавме да дојдеме и до три гола негатива. Требаа дури пет минути после ова за да дојдеме и до нерешени 22:22 по што се влезе во неизвесни десет минути во финишот од натпреварот.

Иако израмнивме никако не успевавме да поведеме туку редовно противникот водеше со еден гол, а ние се обидувавме да израмниме. Таквата игра не донесе до гол негатива на три минути пред крајот на мечот. Потоа следуваше ново реми кое се држеше до крајот на средбата и немаше никакви промени. Се играше гол за гол, а средбата заврши со резултат од 25:25.

Имавме шанса и да победиме, но не успеавме да стигнеме до триумф бидејќи после пробивањето од страна на Алжир, ние лошо изведовме и времето изминуваше па за пет секунди не успеавме да сториме ништо.