Данскиот репрезентативец Никлас Бентнер си обезбедил нов тригодишен договор со тимот на Арсенал, соопштија вчера медиумите на Островот. Со заминувањето на Емануел Адебајор во Манчестер Сити, се отвори поголем простор за другите напаѓачи во екипата, пред се за Бентнер кој би требало сезонава заедно со Едуардо и Аршавин да биде еден од главните играчи во предниот ред. Данецот имаше договор до 2011 година, но според новиот ќе остане на Емирати дополнителни три сезони за неделна плата од 50 илјади фунти.
"Со заминувањето на Адебајор, Бентнер доби поголема самодоверба. Неверојатно е променет во последно време и со тоа си го заслужи новиот договор", изјавил за Сан близок извор до Арсенал.
Една од причините за поголемата слобода на Бентнер по заминувањето на Адебајор е тоа што пред околу година и пол имаше физичка пресметка со Тогоанецот и тоа за време на натпревар од Карлинг-купот против Тотенхем. Адебајор тогаш беше една од ѕвездите во екипата, додека Бентнер тукушто влегуваше во тимот. Како дел од новиот почеток во Сити, Данецот пред почетокот на сезоната го смени бројот на својот дрес, па место 26 сега носи 52.