Како што е обичај на секоја Олимпијада пред нејзиниот почеток во Олимпиското село се креваат знамињата на земјите учеснички. Македонското знаме беше кренато на јарболот во Вистлер, така што сега и нашата земја е присутна.
Македонија со своето знаме се наоѓа на јарбол меѓу француското и финското. Ова се земји коишто значат многу во скијањето, посебно во алпските и нордиските дисциплини. Затоа секако дека значи многу и овој податок знамето на Македонија да биде едно до друго со две големи скијачки земји како Франција и Финска.
Денот кога се креваше знамето можеше да се види и атмосферата во Олимпиското село. Известувачот на Македонски спорт беше еден од новинарите кои добија акредитација за официјална посета на Олимпиското село. Со тоа можеше да се проследи и чинот на кревање на македонското знаме.
Македонските репрезентативци, како и другите членови на делегацијата го проследија кревањето на знамето од просторија во Олимпиското село преку видеобим. Директорот на МОК, Владимир Богоевски, беше дел од церемонијата, а присутни беа и повеќето од македонската делегација.
Во Олимпиското село "Вистлер" предвидено е да бидат сместени 2730 учесници на овие игри. Тоа е само пола од бројката бидејќи на овие игри ќе има околу 5500 натпреварувачи од целиот свет.
Условите во селото се добри. Спортистите имаат и простор во кој може да го минуваат слободното време. Организаторот се има погрижено и за забава на учесниците така што покрај напорните тренинзи и натпреварите спортистите ќе можат слободното време да го минуваат во играње билјард, фудбал... Покрај тоа може да се посетува и салата за кревање товар каде што има голем број справи на коишто може да се вежба.
Иако Олимписките игри почнуваат денеска во Ванкувер се е во знакот на петте кругови коишто ќе бидат актуелни во следните 17 денови.