Загреб, 8 септември 2010 (МИА) - Ватерполистите на Србија во последниот натпревар одигран синоќа во Загреб на Европското првенство во ватерполо со победата од 6:5 против Црна Гора го елиминираа европскиот шампион, кој нема да може да ја брани титулата освоена пред две години во Малага.
Во второто четврт-финале Италија извојува победа над Германија со 6:2.
Според распоредот во полуфиналето светскиот првак Србија ќе игра со домаќинот Хрватска, а Италија за противник ја има Унгарија.
Полуфиналните дуели се играат в четврток.
Македонската репрезентација вчера во натпреварот за пласман загуби од Турција со 9:6 и во натпревар за 11.место в четврток ќе игра со Русија која со истиот резултат беше поразена од Шпанија.
Истиот ден ќе се одиграат и дуелите за пласман Шпанија – Грција и Турција – Романија, додека во натпревар за 5.место Црна Гора и Германија ќе играат в петок.