Со победите во синоќешните полуфинални дуели на ЕП во ватерполо, репрезентациите на домаќинот Хрватска и на Италија се изборија за учество во финалниот натпревар на шампионатот што се одржува во Загреб.
Хрватска во неизвесен натпревар го победи светскиот шампион Србија со 10:9, додека Италија ја совлада Унгарија со 10:8 нанесувајќи и го првиот пораз на првенството. Поразените селекции на Србија и Унгарија в сабота ќе играат во „малото финале“.
Во натпреварите за пласман одиграни вчера Македонија во дуелот за 11.место загуби од Русија со 5:4, додека во дуелите за пласман од 7-10 место Шпанија – Грција 12:11 и Романија – Турција 15:8.
Денеска на првенството се играат натпреварите за пласман кај мажите. Грција и Турција ќе играат за 9. место, Шпанија и Романија за 7.место, а Црна Гора и Германија за 5.место.
Попладнето се играат натпреварите во женска конкуренција меѓу Италија и Холандија за 3.место и финалето меѓу Русија и Грција од 20 часот.