Тениската репрезентација на Србија триумфираше во Дејвис купот откако во финалето во Белград ја совлада Франција со 3:2.
Пред околу 15 илјади гледачи во Белградската Арена, Србија успеа да направи пресврт и вчерашната предност на Франција од 2:1 да ја анулира. Се почна одлично за домаќинот откако во дуелот на двајцата најдобри играчи на репрезентациите, Новак Ѓоковиќ го надигра Гаел Монфис со 6:2; 6:2 и 6:4 по сетови.
Понесен од одличната игра на „првиот рекет“, Виктор Троицки на идентичен начин го совлада Мишел Лодра во решавачкиот меч или 6:2; 6:2 и 6:3 по сетови.
Во решавачкиот дуел и двајцата селектори ги сменија играчите, а беше предвидено да играат Јанко Типсаревиќ за Србија и Жил Симон за Франција. Србија без пораз на домашен терен стигна до титулата во Дејвис купот и стана 13. репрезентација што победила во ова натпреварување.