Македонската ватерполо репрезентација од пласман на Олимпијадата во Лондон ја дели само една победа, откако ноќеска во последниот натпревар од групата А ја победи Германија и обезбеди четвртфинале на олимписките квалификации кои се одржуваат во Едмонтон, Канада.
До победата над Германија од 6:4 македонските репрезентативци стигнаа со убедлива игра во третата четвртина кога постигнаа 4, а примија само еден гол. Резултатот по четвртине беше 0:2, 2:1, 4:1 и 0:0.
Најзаслужен за оваа победа беше голманот Милош Маринковиќ со 16 одбрани, додека најефикасен беше Мирослав Ранџиќ со 3 голови, а по еден постигнаа Матео Чук, Срѓан Аксентиевиќ и Петар Ивошевиќ.
На другите две средби од 5.коло во оваа група постигнати се следниве резултати: Грција - Холандија 14:5 и Црна Гора - Романија 14:8.
Табела: Црна Гора 10 бодови, Романија 6, Грција 6, Македонија 4, Германија 4 и Холандија 0.
Противник на Македонија за пласман на ОИ ќе биде репрезентацијата на Шпанија која го освои првото место во групата Б.
Шпанците ноќеска го победија домаќинот на турнирот Канада со 9:6. Во втoриот натпревар од последното коло во оваа група, Бразил и Турција одиграа нерешено 11:11. Слободна беше Аргентина.
Табела група Б: Шпанија 8 бодови, Канада 6, Бразил 3, Турција 2 и Аргентина 1.
Покрај натпреварот Шпанија - Македонија кој ќе се одигра вечерва еден часот по полноќ, во другите четвртфинални дуели ќе играат: Црна Гора - Турција, Романија - Бразил и Грција - Канада.
Четирите најдобри репрезентации од овој турнир ќе учествуваат на Олимписките игри во Лондон.