Македонски навивачи ќе го преплават Гетеборг во текот на предолимпискиот ракометен турнир кој започнува денеска во арената „Скандинавиум“. Според податоците со кои располага Ракометниот сојуз на Шведска, на натпреварите од 6 до 8 април се очекуваат 4.200 македонски навивачи и фанови.
Шведска се среќава со Македонија утре, но прашање е кој тим ќе добие најголема поддршка од трибините во „Скандинавиум“, домаќините или македонската репрезентација.
- Ни останува само да се надеваме дека шведската публика ќе си го направи своето, вели Франк Стром при Ракометниот сојуз на Шведска.
На Европското првенство во јануари годинава - пишува „Свенска дагбладет“ - бројните и бучни македонските навивачи создадоа енормен притисок врз мечевите, а што несомнено придонесе Македонија да направи изненадување со пласман на петото место на турнирот.
Одговорните во „Скандинавиум“ очекуваат во текот на предолимпискиот турнир, кој, значи, ќе трае до недела, да се продадат вкупно околу 23.000 влезници. Максималниот капацитет на „Скандинавиум“ за сите три дена би можел да биде преку 33.000 навивачи на трибините. Но, со оглед на тоа дека денеска во Шведска започнуваат Велигденските празници, за очекување дека многумина ќе се определат и за други активности.