Македонскиот вицешампион Вардар Про, ја доби дерби пресметката со македонскиот шампион Металург во 8. коло во Регионалната СЕХА Лига. Избраниците на тренерот Веселин Вујовиќ со последниот свиреж на судијата успеаја да ги победат “металурзите” со 27:26. (17:14). Прибак, беше ракометарот кој направи чудо во СРЦ Кале. Тој со удар од девет метри успеа да го совлада голманот на Металург, Никола Митрески ( кој застана на голот во 9. минута откако Дарко Станиќ доби црвен картон) и да му ја донесе многу посакуваната победа на Вардар.
Како и секоја пресметка на овие два клуба и ова мина во тензична атмосфера што ја направија навивачките групи на тимовите. Натпреварот започна со задоцнување од десет минути, вардарци одлично го отворија натпреварот и уште на средина од првото полувреме направија солидна предност од четири голови (12:8). До крајот на полувремето црвено - црните ја одржуваа разликата и на одморот заминаа со предност од три голови (17:14)
Во вториот дел избраниците на Веселин Вујовиќ продолжија во ист ритам, а веќе во 39. минута имаа предност од седум голови (21:14). Металург, во второто полувреме не успеа да постигне гол десет минути. Мразот го скрши Ракчевиќ во 40. минута. Од овој момент “металурзите” почнаа да играат поцврсто, а тоа го направи понеизвесен овој меч. До точката на вриење дојде на неполна минута до крајот кога металурзите израмнија на 26:26. Но, “вардарци” го имаа последниот напад, а и среќата на нивна страна, така што Прибак го реши мечот со удар од девет метри.
Најефикасен во редовите на Вардар Про беше Марковиќ со десет голови, а во тимот на Металург прва виолинa беше Ренато Вугринец со седум погодоци