Пекинг, 6 октомври 2013 (МИА) – Српскиот тенисер Новак Ѓоковиќ ја освои четвртата последователна титула на АТП турнирот во кинескиот главен град. Тој денеска во финалето го совлада Рафаел Надал (Шпанија) со 2:0 – по сетови 6:4 и 6:3.
Ѓоковиќ досега нема загубен меч на турнирите во овој град.
И покрај денешната победа, Србинот од утре ќе му го препушти врвот на Светската листа на шпанскиот тенисер кој имаше извонредно успешна година по враќањето на терените по повредата на колената.
Најдобрите светски тенисери кои се наоѓаат на далечниот Исток и кои викендов играа на турнирите во Токио и Пекинг и следната недела остануваат на азискиот континент каде ги очекува АТП Мастерсот во Шангај.