Сите деветнаесетмина ракометари кои ги одработуваат завршните подготовки на македонската репрезентација ќе патуваат за Данска на Европското првенство кое започнува во недела на 12 јануари.
Директорот на репрезентацијата Стевче Алушовски потврди дека сите ракометари се во тренажен процес, вклучително и Дејан Пецаковски кој на почетокот на подготовките во Порторож се здоби со повреда на коленото.
- Имаме на располагање 19 ракометари. Попладнево сите се на тренинг. Засега планот е сите да патуваат за Данска, а таму селекторот Ивица Обрван ќе реши кои шеснаесетмина ќе играат во првата фаза, изјави Алушовски за МИА.
По се што ни се случи, додаде тој, принудени сме на ваква одлука, а се надеваме дека до почетокот на првенството во недела против домаќинот Данска сите ракометари ќе бидат максимално подготвени.
Постои и можност селекторот Обрван за првиот натпревар да пријави 15 ракометари, а дополнително да се реши кој ќе биде 16-тиот. Од оние девентаесетмина кои Обрван ги има на располагање извесно е дека Немања Прибак поради пропозициите нема да може да настапи во првата фаза.
- Во втората фаза може да направиме две измени, доколку селекторот Обрван оцени дека тоа потребно, а дај Боже да стигнеме и до последната трета фаза, тогаш имаме право на една замена, дополнува Алушовски.
Македонските ракометни репрезентативци до петок ќе ги финализираат подготовките, а во сабота заминуваат за Хернинг каде во недела од 20 часот и 30 минути против домаќинот и актуелен европски шампион Данска ќе го одиграат првиот натпревар на ЕП.
Дуелите против Чешка и Австрија ќе се играат на 14 и 16 јануари во терминот од 18 часот и 15 минути.