Светскиот тенисер број 2, Новак Ѓоковиќ е оптимист дека може да биде подготвен за настап на Мастерсот во Мадрид за две недели откако се заклучи дека повредата на зглобот на раката не е толку сериозна.
Србинот го повреди десниот зглоб на тренинг пред Мастерсот во Монте Карло, каде што како актуелен шампион загуби од Роџер Федерер во полуфиналето. По мечот, тој ги „подгреа“ шпекулациите за долга пауза велејќи дека нема да може да игра тенис „подолго време“.
Но, последните тестови беа позитивни, и Ѓоковиќ доби совет дека му треба само одмор пред да почне со подготовките за турнирот во Мадрид, кој започнува на 5 мај.
„За среќа, ситуацијата со повредата е подобра отколку што мислевме. Лекарите ме убедија дека ќе бидам подготвен за Мадрид, а потоа и за Рим и за Ролан Гарос, според планот. Сепак, останувам на медицинскиот третман и ми треба мала пауза“, вели Ѓоковиќ.