Движечката сила на машката ракометна репрезентација на Македонија, Кирил Лазаров викендов преку својот фејсбук профил отворено го изнесе својот став за случувањата во македонскиот репрезентативен ракомет. Ваквата реакција е испровоцирана од неуспесите на женската кадетска репрезентација на СП, како и на јуниорската селекција на ЕП во Австрија.
Лазаров смета дека успесите во европските клупски натпреварувања на двата гиганти Вардар и Металург ги „кријат“ неуспесите на националните тимови, кои според него се во „благ пад“.
„Три убедливи порази на нашите ракометари на ЕП 20 год., кадетките три катастрофални порази на домашен терен (освен победата со Узбекистан), женската сениорска репка не знае за победа, а камоли пласман на големо натпреваруванње, сениорите мажи освен третокласната Грција, која ни дојде како мевлем за заборавање на минатите порази (ЕП Данска 4 високи порази ДЕН, ХУН, ИСЛ, ЕСП)… Мораме да признаеме дека македонските национални селекции ни се во ‘благ’ пад. Сето тоа добро го прикриваме со нашите моментно успешни клубови на европска сцена, Вардар и Металург, меѓутоа клубови се едно, а национална селекција друго.
Едното не може без другото, треба соработка и надополнување меѓутоа за иднината на нашиот спорт бр. 1 секогаш приоритет треба да имаат националните селекции на кои во последно време не им цветаат рози…“, стои на фејсбук профилот на Лазаров.