Четирикратниот светски првак Себастијан Фетел побара од неговиот тим да го стигне Мерцедес, па за тоа вели дека дури би ги пратил инженерите да шпионираат во конкуретниот тим.
„Јас би ги пратил моите инженери во фабриката на Мерцедес за да ја откријат тајната поради која овој тим ни бега и прави подобри резултати“, вели Фетел.
Тој го кажа ова на прашањето која е тајната што би сакал да ја дознае од таборот на „сребрената стрела“.
Фетел е разочаран од досегашниот дел на сезоната, па затоа вели дека ќе треба да се направи многу за да се стигнат противниците. Инаку, заостанува дури 114 поени зад лидерот во генералниот пласман, Нико Розберг.
ФЕРАРИ ЌЕ КОРИСТИ МАГИЧНА БОЈА
Во тимот на Ферари планираат да користат магична боја за да успеат да добијат на брзина. Се работи за боја која ќе се користи за подмачкување на моторите, а таа ќе служи како заштита и ќе ја задржува топлината.
Веќе на следната трка би требало да донесе резултат, а дотогаш ќе биде направен тест. Ферари планира да вози со новитетите на трките во Белгија и во Италија, а се смета дека ќе се добие зголемување на брзината за 20 коњски сили.