Денеска ни е потребна каква било победа против Исланд за целта да биде на дофат
Машката кадетска репрезентација на Македонија против Србија ја забележа првата победа на Европското првенство во Полска, 20:23 (9:9). Првата радост за кадетите на континенталниот собир дојде во групата за разигрувањето за пласман од 9. до 16. место.
Младите надежи со позитивниот резултат ги одржуваат во живот шансите за пласман до 10. позиција на првенството, кои носат учество на Светското првенство 2015.
За разлика од бледите изданија во прелиминарната фаза од ЕП, вчера избраниците на Александар Јовиќ покажаа дел од своите квалитети. Одличниот финиш на првиот период и константната игра во второто полувреме беа клучни за премиерната радост на кадетите на континенталниот собир.
Солидно го стартувавме мечот, 2:2, но дозволивме Србите двапати да влезат во серија (5:2, 9:4) за што клучна улога играше и нивниот голман Милосављев, со 11 интервенции во првиот дел. Сепак, во завршните осум минути од полувремето игравме помирно во нападот и имавме одлични 0-5 (9:9). Имавме шанси со контра да дојдеме и до водство, но сепак со изедначен резултат заминавме на паузата.
Во продолжението ние ја преземавме иницијативата. Првото водство за Македонија од +2 дојде на 10:12, а потоа се играше рамноправно се до 19:19. По тајм-аутот на Јовиќ (53 мин.) кадетите поведоа до 19:21 и ја најавија победата. Србија се обидуваше да се избори за пресврт, но Кизиќ себично го чуваше голот во завршните минути, за Македонија дојде до првата победа на ЕП.
Најдобриот стрелец во нашите редови, Марко Неловски (8 погодоци) се пожали на повреда во средината на второто полувреме, но по лекарската интервенција, репрезентативецот се врати на теренот. Покрај него Талески постигна 5, а Маркудов 4 гола.
Македонија, попладнево, 13 часот, се соочува со Исланд. Со оглед на случувањата во нашата група, каде вчера Исланѓаните ја совладаа Русија, денеска каква било победа над нив нè носи на 2. место во групата, а со тоа и кон повисок пласман. Во спротивно многу математики ќе бидат во игра.
ПАЛЕВСКИ „Пристапот беше клучен“
„Задоволни сме со пристапот и односот на теренот во мечот против Србија. Го оставивме срцето на терен и затоа дојдовме до победа. Следна пречка е Исланд и доколку успееме да ги совладаме и нив, се надевам дека ќе обезбедиме пласман на Светското првенство во Русија“, коментираше Давор Палевски по победата над Србија.