Македонскиот шампион Вардар СЦБТ денеска финишира со подготовките во Австрија, а од таму директно патува за Унгарија, каде од 22 до 24 ќе биде дел од турнирот во Ѓер, на кој покрај домаќинот, ќе настапи и екипата на Ларвик.
Токму овој турнир ќе биде сериозен испит за избраничките на Индира Кастратовиќ, кои досега имаа само една проверка на силата. Победата над унгарски Ерд (27:24) ја донесе првата слика за досега сработеното, но факт е дека екипата сè уште работи на своето најблескаво издание.
„Добро го одработивме периодот во Австрија. Екипата доби на целина, новите девојки добро се вклопија во тимот, но сè уште работиме на посакуваната форма. Мечот со Ерд беше показател на предностите, но и маните. Мора да поработиме на поголема концентрација во завршницата од играта“, објаснува Индира Кастратовиќ и додава: „Сега ни следуваат посериозни контроли со Ѓер и Ларвик. Постојано им велам на девојките дека нема опуштање. Сега сите ја знаат силата на Вардар и сите поинаку нè доживуваат. Затоа и ние ќе бидеме поподготвени за секој предизвик“.
„Црвено-црните“ денешниот ден ќе го минат во пат, а веќе утре го стартуваат настапот на „Хендбал фиеста“ турнирот.