Роџер Федерер можеби е во најдобра форма пред УС опен, но Новак Ѓоковиќ е фаворитот за титулата, смета поранешниот шампион Џон Мекинро.
Федерер има пет едноподруго титули од Флашинг Медоуз од 2004 до 2008, а оваа сезона победи на Мастерсот во Синсинати и стигна до финалето во Торонто. На турнирот нема да игра светскиот број 2, Рафа Надал, така што многумина го сметаат токму 33-годишниот Швајцарец како фаворит за неговата 18-та гренд слем титула. Но, не и Мекинро.
„Очигледно, тоа што нема да мора да се соочи со Надал е голема позитивна вест за него, посебно во финишот на турнирот. Но, сепак, би го промовирал Ѓоковиќ во фаворит бидејќи тој е помлад и може полесно да ги игра долгите мечеви од Роџер. Зависи од што ќе се случи пред потенцијалното финале, но мислам дека Новак е поголем фаворит“, вели Мекинро.
Ѓоковиќ го совлада Федерер во епското финале во Вимблдон, но 27-годишниот Србин, кој неодамна се ожени со својата дологодишна девојка Јелена Ристиќ и го чека првото дете, загуби рано во Торонто и Синсинати. Мекинро смета дека тој малку го загубил фокусот.
„Мислам дека неговиот ум не е на тенисот постојано, но тоа финале од Вимблдон беше вистинска класика. Потоа се ожени, немаше многу мечеви... Во Њујорк ќе биде поинаку“, додава Мекинро.