Првиот пехар сезонава македонскиот шампион Вардар го крена викендов како освојувач на „Хандбал фиеста“ турнирот во Ѓер. „Вардарки“ ги поразија и актуелниот европски шампион Ѓер и норвешкиот првак Ларвик, што им донесе комплетно задоволство при затворањето на 20-дневните подготовки во Австрија и Унгарија. Особено победата на Ѓер силно одекна низ медиумите, а ако денот по утрото се познава, тогаш може ли ова да биде само најава за она што треба да го очекуваме од „црвено-црните“ дами сезонава?
„Не сакам да најавувам ништо. Нема потреба. Мојот став е дека одиме чекор по чекор. Навистина, сè помина одлично и подготовките во Австрија и настапот на турнирот во Ѓер. Она што беше замислено го реализиравме.
Но, од друга страна имаме уште многу за работа. Натпреварувачката форма треба да се гради сè уште, треба да се коригираат некои моменти во играта, а за сето тоа потребно е време. Најважно ми е што сè помина во најдобар ред и што сите живи и здрави се вративме дома“, децидна е Индира Кастратовиќ, стратегот на Вардар.
КОМПАКТНИ
Уште при првите контроли на силата се виде дека новите засилувања одлично се вклопија во тимот. Кастратовиќ доби повеќе играчи во ротација, а истовремено и повеќе квалитетни алтернативи кои може да одговорат на задачата.
„Новите девојки одлично се вклопија во тимот. Нормално е тие се професионалци и многу е лесно да се работи во таква атмосфера. Засега видовме на кого може да сметаме на одредена позиција, како функционираат линиите. Сепак, има уште финеси на кои треба да работиме. Имаме доволно време и простор за тоа“, заклучува Кастратовиќ.