Билетите со кои ќе може да се следи целата сезона во ЛШ, Металург ќе ги пушти во продажба следната недела, Вардар ќе инфомира за петнаесетина дена
Премиерата на СЕХА ГСС-лигата во Скопје мина успешно. Не само резултатски, туку изненадувачки со оглед на тоа дека летото сè уште трае, во салата имаше по слободна проценка околу 4000 гледачи, што покажува дека ракометот не излегол од мода.
И глетката на полните трибини веднаш го постави прашањето за тоа како ќе изгледаат трибините за време на Лигата на шампионите следната сезона. Искуството од претходните три години вели дека најдобро минаа фановите кои си обезбедија сезонски билети и по тоа незаинтересирано ги следеа турканиците за билет и за двата наши најдобри клуба.
Информација за продажбата на билети побаравме и од таборот на Металург и од Вардар. Металург и оваа сезона продолжува по веќе утврдената практика. Ќе има и сезонски билети, ќе има и еднократно, ќе можат да се набават и на каса и онлајн. Цената сè уште не е утврдена, но претпоставка е дека ќе чини од 1200 до 2000 денари во зависност од позицијата. Тоа значи дека цена на билет би бил од 250 до 400 денари за групната фаза од натпреварите. Информацијата не е официјално потврдена. Билетите на каса би требало да се најдат следната недела. Сопствениците на сезонски билети се и сопственици на истите места во салата (бесплатно) и за натпреварите на СЕХА лигата. Така беше лани, веројатно така ќе биде и сезонава.
Вардар од оваа година натпреварите од Лигата на шампионите ќе ги игра во „Јане Сандански“ што сигурно ќе биде магнет плус, особено на почетокот на сезоната. Информација за продажбата на билети клубот ќе објави петнаесетина дена пред почетокот на натпреварите или некаде по 15 септември.