Следејќи го успехот од премиерниот Ф4 турнир во Будимпешта во Лигата на шампионите во женска конкуренција минатата сезона, Европската ракометна федерација (ЕХФ) потврди дека унгарскиот главен град ќе биде домаќин на завршните турнири и во следните две години.
ЕХФ потпиша договор со Унгарската ракометна федерација, дека арената „Ласло Пап“ во Будимпешта ќе биде локацијата на која ќе се одиграат „фајнал-фор“ турнирите и во 2015 и 2016 година.
Унгарскиот шампион Ѓер во мај годинава, пред 10.000 љубители на ракометот ја прослави втората во низа титула во ЛШ, а со овој договор ќе има можност истата да ја брани на домашен терен. Македонскиот првак ЖРК Вардар исто така беше дел од финалниот турнир претходната сезона и заврши на третото место.
Завршницата од Лигата на шампионите во машка конкуренција од 2010 година се одржува во Келн, кој ќе остане домаќин на Ф4 турнирите исто така до 2016 година.