ВАРДАР – НЕКСЕ
Недела, 20:15ч.
Сала СРЦ „Кале“ во Скопје. Судии: Милјан Вешовиќ и Новица Митровиќ од Црна Гора. Делегат: Небојша Вијушиќ од Црна Гора.
*Последниот тест на силата пред стартот на ЛШ „црвено-црните“ го имаат во неделниот меч, иако, се чини, одново ќе бидат некомплетниВардар враќањето на победнички патеки во СЕХА ГСС-лигата го најавува за викендов, односно утре, кога од 20:15 часот, во СРЦ „Кале“ во Скопје го пречекува тимот на Нексе.
Хрватскиот состав во годинешното издание имаше тежок распоред и во три натпревари запиша три порази и се наоѓа на дното на табелата. „Вардарци“ досега имаат само еден негативен резултат, на последното гостување кај Веспрем и три победи, и од втората позиција како фаворити влегуваат во дуелот.
За „црвено-црните“ овој натпревар е последна проверка на силата пред стартот на Лигата на шампионите, следниот викенд, кога Вардар му гостува на Целје.
„Со Нексе го играме последниот натпревар пред стартот на Лигата на шампионите и тоа ќе биде генерална проверка за нас. Мора да одиграме добро и напорната работа од оваа недела да биде евидентна на теренот.
Нексе и добар тим, кој има квалитетна одбрана, особено во центарот, преку пикери и бекови. Има млади мотивирани играчи, кои во првите десет минути играат особено цврсто. Се надевам на добар меч, кој за нас е добредојден во моментов“, истакна стратегот на Вардар, Раул Гонзалез, на прес-конференцијата во пресрет на мечот.
Капитенот Филип Лазаров, пак, не го потценува Нексе и гледа како на ривал, со кој е потребен сериозен пристап.
„Нексе е тим кој заслужува респект. Константен дел се од СЕХА и тим кој се стремеше кон Ф4 во минатите изданија. Иако лошо ја стартуваа сезоната не гледам простор за опуштање. Претходните искуства велат дека знае да биде незгоден противник, па поради тоа крајно сериозно треба да се влезе во натпреварот“, заклучува Лазаров.
Што се однесува до играчкиот состав со кој ќе располага Раул Гонзалез, стратегот одново беше резервиран во одговорите, па само кусо коментираше „ќе видиме за изгледот на тимот“. Најавата е дека Лацковиќ, Терзиќ и Растворцев, кои одмораа поради повреди се вратија во тренажен процес, но прашање е дали ќе настапат в недела. Она што е најважното е дека Гонзалез потенцираше дека до дуелот со Целје во ЛШ, екипата ќе биде комплетно подготвена.