Дека македонската спортска јавност со нетрпение го очекува стартот на Лигата на шампионите потврдува фактот дека СЦ „Јане Сандански“ (капацитет 5.500 седишта) е пола распродаден во првиот ден откако во продажба беа пуштени блок-билетите за натпреварите на РК и ЖРК Вардар во најквалитетното европско клупско натпреварување. Од Вардаровиот табор јасно беше нагласено дека клубот не е во трка со времето за да ги продаде билетите за дуелите од ЛШ, но информацијата е само дополнителен показател за еуфоријата, како и желбата да се бодрат „црвено-црните“ момци и девојки во елитните настапи.
Оваа седмица во продажба се само блок-билетите во сите четири категории, а доколку останат слободни билети ќе има и во поединечна продажба за секој натпревар. Билетите се продаваат онлајн на мктикетс, како и на билетарата на СЦ „Јане Сандански“. Со секој купен блок-билет за натпреварите на РК или ЖРК Вардар во ЛШ, ќе може бесплатно да се следат и натпреварите на ФК Вардар. Истовремено „вардарци“ во хуманитарни цели ќе донираат по десет денари од секој продаден билет.