Металург и Загреб се стари познаници, Металург и Веселин Вујовиќ уште подобро се знаат кои се и што се. Дуелите меѓу македонскиот и хрватскиот тим добија посебен шарм откако Лино Червар се пресели во Скопје, а надмудрувањето со Веселин Вујовиќ доби „епски“ размери овде во Скопје, на дуелите со Вардар.
В сабота, во рамките од третото коло од Лигата на шампионите Металург гостува во Загреб каде ги чека „Првото плинарско друштво“ на чие чело официјално во ЛШ ќе дебитира Веселин Вујовиќ. Дуел кој, секако, ќе има посебно место во животната приказна на двата стратега, вклучително двата клуба.
„Желба ми е да победам на сите натпревари до крај, вклучително и Металург. Тие без оглед на проблемите се многу добра екипа и опасен противник, така што ќе го вложиме целиот свој напор и знаење за да победиме в сабота“, изјави Вујовиќ.
- Сепак, дуел со Металург со сигурност не е „меч како и секој друг“?
„И хрватските медиуми сакаат така да го презентираат. Но, јас искрено така не го доживувам овој натпревар. Металург е Металург, но ова е друга приказна. Не се ова дуели Вардар – Металург со толку проблеми и тензии. Ова е некоја друга приказна во која битни се само двата бода“, изјави Вујовиќ.
ППД Загреб нема да наплаќа билети за овој дуел, а постојано ја повикува публиката да биде нивни осми играч. Дали е Металург некаков магнет за загрепските љубители на ракометот, ќе видиме в сабота.