Набиен распоред, трет натпревар во шест дена имаат ракометарите на Вардар, кои вечерва 20:15 часот во СЦ „Јане Сандански“ во Скопје, го пречекуваат словачкиот шампион Татран Прешов во рамките од СЕХА ГСС лигата.
Едвај успеаја да здивнат од дуелот со Раднички во средата, а веќе вечерва на „менито“ имаат ни повеќе, ни помалку, туку еден од сериозните претенденти за „фајнал-фор“ турнирот, лански учесник на Ф4 во Нови Сад, како и тим, кој сезонава го гледавме во квалификациите за Лигата на шампионите.
Реномено на Татран Прешов вели дека е незгоден противник, непредвидлив дури и кога игра како гостин, па поради тоа „црвено-црните“ момци ќе мора да го задржат високото ниво на игра и покрај заморот за да може со оценка одличен да ја пречекаат паузата од клупските, за да се посветат на репрезентативните обврски.
„Три натпревари во шест дена, напорно темпо. Прешов е далеку посериозен противник од Раднички, игра силно во одбраната и знае да изненади и на гостински терен, тоа веќе го има и покажано во Скопје.
Без оглед на сè, потребна ни е победа за да може во пресрет на паузата да добиеме потврда дека добро сме го одработиле овој дел од сезоната и дека сме на вистинскиот пат кон Ф4“, смета капитенот на Вардар, Филип Лазаров.
И Раул Гонзалез е свесен дека неговите избраници се истрошени, но јасно е дека бодовите против Татран се важни.
„Прешов е добар тим, кој игра цврсто во одбраната, формација 6-0, има добри шутери и е еден од претендентите за ’фајнал-фор’. Малку сме уморни, ова е трет натпревар неделава, но бодовите од дуелот ни се важни и на момците тоа им е јасно“, истакна стратегот.
Одново Шпанецот ќе комбинира со составот, а со исклучок на Алекс Душебаев и Добривоје Марковиќ, кои се повредени, останатите ракометари му се на располагање.
„Вечерниот тренинг ќе даде слика за тоа како се чувствуваат играчите, дали има некоја повреда и од тоа ќе зависи кој ќе биде во составот утре“, додава Гонзалез.
ТАБЕЛА
1. ВЕСПРЕМ 7 7 0 0 224:161 21
2. ВАРДАР 7 6 0 1 210:178 18
3. ТАТРАН 6 4 0 2 187:163 12
4. МЕШКОВ 5 4 0 1 151:132 12
5. ЗАГРЕБ 6 3 0 3 165:155 9
6. МЕТАЛУРГ 5 3 0 2 136:132 9
7. РАДНИЧКИ 7 1 1 5 191:217 4
8. БОРАЦ 7 1 1 5 184:223 4
9. НЕКСЕ 6 1 0 5 139:182 3
10. ВОЈВОДИНА 8 0 2 6 187:231 2