Лино Червар, тренерот на македонскиот ракометен шампион Металург на прес-конференцијата по синоќешната победа над Борац од Бања Лука, ја повтори тенденцијата на клубот од Автокоманда да им дава повеќе шанса на помладите играчи.
- Задоволен сум што победивме. Со противникот делиме желба да дадеме можност на помладите ракометари. Така беше во Нови Сад, така беше и денеска. Тие мораат да имаат натпревари, а ние мораме да имаме трпение за нивните грешки, иако денеска имаа и добри моменти. Ќе истраеме со политиката на нашиот клуб и во наредните две години ќе даваме уште повеќе можности и на некои други млади ракометари од нашиот погон, секако во спрега со искусните ракометари кои го носат дресот на Металург. Одигравме добро, иако имавме и одредени падови. Повторно имавме проблем со реализацијата на седмерците, но се на се видовме фер и коректен натпревар во кој заслужено победивме, истакна Червар.
Еден од помладите ракометари на Металург и голема надеж на македонскиот ракомет Филип Талески очекува да добие поголема минутажа и во натпреварите од Лигата на шампионите.
- Во овој натпревар влеговме максимално мотивирани и постојано го држевме под контрола резултатот. Знаевме да ги искористиме слабостите на противникот. Среќен сум што ние помладите добиваме шанса во Регионалната лига, а се надевам дека ќе добиваме и во Лигата на шампионите, рече Талески.
Металург претходно во натпревар од 7.коло од регионалната СЕХА лига го победи Борац со 24:17.
