Фановите на Металург, ракометните заљубеници кои ја следат македонската репрезентација и сите неутрални спортски фанови утрово би требало да стискаат палци за најавениот состанок меѓу врвот на Металург и ракометарите да има позитивен епилог.
Во ситуацијава не би знаеле како да дефинираме точно што е тоа позитивен епилог без да заземеме страна. Но, тоа што јавноста со сигурност тешко го вари е актуелнава ситуација која мора да престане.
А мора да престане денеска.
Мора итно да има некаков епилог затоа што денеска е последниот рок во кој Металург може да пријави играчи за натпреварите со Ла Риоха од Лигата на шампионите. Дали тоа ќе бидат ракометарите што досега играа или ќе бидат некои нови е прашањето на кое одговорот би требало да го знаеме, во најдобар случај до пладне.
Во моментов, со Петар Мисовски, кој доби сертификат и право да биде регистриран, Металург има осум ракометари за настап во Лигата на шампионите.
Ако не се најде заеднички јазик со побунетите, суспендираните ракометари тогаш клубот ќе биде принуден да повлече ракометари од Металург 2 или да најде некои нови и на тој начин ќе има екипа за настап, но не и за резултати во ЛШ. Тоа дополнително ќе го руши тоа што се работеше со години, истовремено ќе го ослабе и Металург 2 и како ќе изгледа финалниот продукт, не би сакале ни да замислиме затоа што тоа од наш агол дефинитивно не е позитивен епилог од разговорите.
Не би долевале масло на огнот со нова ретроспектива на досегашните случувања и предвидувања за можните сценарија.
Се надеваме дека денеска разговорите ќе се бидат „чесен, фер дијалог со заемно почитување“, каков што всушност и се посакуваше.