„Пристапот во мечот, првите десет минути мора да бидат поинакви, како и нападот... Во спротивно ќе имаме многу проблеми“, заклучува бекот
Општ заклучок во „црвено-црниот“ табор по несреќниот пораз од Веспрем, викендов е дека мора да се промени влезот во мечот. Првите 15-тина минути во Скопје беа многу тешки, а се најдовме и во ситуација да бркаме негатива. Тоа е сценарио кое не смее да се повтори на возвратниот дуел во Унгарија бидејќи со такво издание Вардар може да се најде во сериозни проблеми.
„Потребно е да извлечеме поука. Многу посилно мора да влеземе во мечот во Веспрем. Тие играат многу поагресивно и посигурно на домашен терен. Ако не се лажам немаат пораз во изминативе три години пред своја публика.
Имаме доволно време за анализа на мечот, да видиме каде грешевме, што треба да се корегира, да се постави стратегија...
Мислам дека одбраната функционираше добро во Скопје и треба да го задржиме тоа ниво, но во нападот мора повеќе да трчаме, да правиме помалку грешки.
Пристапот, влезот во мечот е најважен, првите десет минути мора да бидат поинакви“, смета „Вардаровиот“ бек Алекс Душебаев.
ГРУПНАТА ФАЗА ТРПИ ПОРАЗ
Поразот од Веспрем секако дека боли, особено затоа што е прв во ЛШ сезонава, но Душебаев смета дека е подобро сега отколку во некој од елиминациските фази.
„Во групната фаза поразите се подносливи, иако не велам дека не болат. Несреќно загубивме, не одигравме добро во последната минута и тоа скапо го плативме. Но, мислам дека е најважно што екипата учи и расте и од ваквите тешки натпревари. Тоа не прави посилни и поподготвени за оние позначајни натпревари кои ќе следат во елиминационите фази“, заклучува Душебаев.