„По сите повреди, ќе мора да се скрпиме, но ќе издржиме затоа што бодовите во Турингер ни се важни, се пренесуваат во групната фаза“, децидна е Пенезиќ
Завршниот викенд од натпреварувањето во групи во Лигата на шампионите македонскиот првак Вардар го пречекува со реализирана цел, како еден од тимовите од групата „Б“ кои патуваат во главната фаза.
Но, патот дотаму зема голем данок, повредите на Андреа Лекиќ, Јулија Николиќ и Бегоња Фернандез, како и претходно на Татјана Хмирова. Така, последната обврска која „црвено-црните“ ќе треба да ја одработат во оваа рунда, гостувањето кај Турингер, в сабота, ќе биде со редуциран состав. Нема да биде лесно, но оние со кои располага Индира Кастратовиќ се подготвени да го понесат товарот.
„По сите повреди кои се случија вистина е дека редовите ни се редуцирани. Четири ракометарки ротираме на надворешните линии, но се надевам дека Јуле ќе ни се врати неделава. Мораме да излеземе на крај со притисокот. Останува само уште мечот со Турингер, ќе се скрпиме, ќе издржиме. Ќе дадеме сè од себе за настапот во оваа група да го завршиме со победа. Бодовите во Германија ни се важни затоа што тие се пренесуваат во следната фаза од ЛШ“, смета левиот бек на „вардарки“ Андреа Пенезиќ.
ТИМОТ ПРЕД „ЅВЕЗДИТЕ“
Двапати за месец дена Пенезиќ се најде меѓу „трите ѕвезди“ на колото според ЕХФ. Бекот беше најефикасната ракометарка во дуелот со Будуќност, вистинска „движечка сила“ во нападот. За Пенезиќ индивидуалните награди годат, но тимот го има приоритетот.
„Тимот е најважен. Не велам дека индивидуалните награди и признанија не годат, но екипата го има приматот. Ме радува што од натпревар во натпревар играме сè подобро, се креваме. Полека влегуваме во ритам каков што посакувавме.
Можеби и повредите играат голема улога. И против Будуќност можевме и да победиме, иако и бодот е голема работа.
Сега е најважно да завршиме како што треба, па потоа, по репрезентативните обврски, да се вратиме во најдобро светло за главната фаза“, завршува Пенезиќ.
„Црвено-црните“ дами последната обврска годинава во ЛШ ја имаат в сабота кога му гостуваат на Турингер.