Унгарскиот шампион Веспрем му го нанесе вториот пораз на Вардар во Ц групата од Лигата на шампионите, откако попладнево забележа висок триумф со 32:24.
„Црвено-црните“ не успеаја да му се реваншираат на противникот за минатонеделниот пораз во Скопје. Напротив, унгарскиот состав беше убедлив на свој терен, а победникот се наѕираше уште по првото полувреме кое заврши во полза на Веспрем со 16:10.
Голманот на Унгарците Роланд Миклер со 17 одбрани и Момир Илиќ со осум погодоци беа предводници во убедливата победа на нивниот тим. Најефикасни во Вардар беа Немања Прибак, Алекс Душебаев и Тимур Дибиров со по четири реализации.
Во 6. коло од оваа група вечерва играат Чеховски Медведи и Монпеље, а утре колото ќе го заокружат Цеље и Рајн Нехар.
Табела: Веспрем 12 бодови (6 натпревари), Вардар 7 (6), Рајн Нехар 6 (5), Монпеље 4 (5), Цеље 2 (5), Чеховски Медведи 1 (5).
Следниот натпревар Вардар ќе го игра на 29 ноември на домашен терен против Цеље.