За македонскиот шампион Вардар дефинитивни се датумите и термините за натпреварите од главната фаза од Лигата на шампионите. Така, продолжението од најквалитетното европско клупско натпреварување за девојките на Индира Кастратовиќ почнува на 30 јануари (петок) на гостувањето кај Лајпциг од 19:30 часот. Во договор со „АЛФА“ телевизијата, која ги има правата за пренесување на натпреварите од ЛШ, „вардарки“ кога играат на домашен терен во СЦ „Јане Сандански“ во Скопје го задржуваат стандардниот термин, сабота, 19 часот, па така Крим го пречекуваат на 15 февруари, Лајпциг на 28 февруари, додека главната фаза ја заокружуваат со Динамо на 14 март.
Второто гостување во Русија „вардарки“ ќе го имаат на 15 февруари од 16 часот, а засега сè уште е непознат терминот за третото гостување во Словенија, кај Крим Меркатор, со оглед на тоа дека домаќинот ја нема доставено таа информација.
Вардар натпреварувањето по групи го финишираше на второто место во групата Б, што му овозможи во главната фаза да пренесе три бода, кои се основа за да се брка што повисок пласман на патот кон четвртфиналето.
Најголем дел од Вардаровите ракометарки во моментов се посветени на репрезентативните обврски и настапите на Европското првенство, додека првиот собир и подготовките за вториот дел од сезоната екипата ќе ги има на 5 јануари во Скопје.