Актуелниот тренер на Металург, Лино Червар, кој е поранешен селектор на селекцијата на Хрватска, деновиве е интересен за хрватските медиуми како аналитичар за случувањата на Светското првенство во Катар.
Така во една анализа, за „Јутарњи лист“ каде зборува за групата „Б“ и Македонија, како противник на Хрватите во истата стратегот ја претставува нашата репрезентација како Металург, а успесите на Обрван си ги препишува како заслуга за работата во клубот.
„Моите играчи ја прават основата на македонската репрезентација во Катар, дури осум ги има во репрезентација. Исклучок се Кире Лазаров и Борко Ристовски, како и едно-две имиња од Вардар, сите други се „металурзи““, вели Червар.
На прашањето како ќе го оцени водењето на Ивица Обрван на нашиот тим и на играта на Македонија, Червар одговара:
„Делуваат многу добро, особено на првиот меч со Тунис. Тоа е доста искусна репрезентација, овие години во Металург поставивме тактичка дисциплина и така играат и сега. Македонија нема звучни имиња освен Кире Лазаров, но за секој може да бидат многу незгодни.
Главната проверка колку се навистина силни ќе ја имаат со Хрватска. Хрватска е фаворит, но исто така мораат да знаат дека играат против силно организирана екипа. Имаат одличен пивот, голман и Кире, кој е лидер“.
Инаку, Червар, како што најави и пред десетина дена, СП ќе го следи од Загреб, во исчекување на информација од првиот човек на клубот, Минчо Јорданов, каква ќе биде судбината на Металург.