Во зависност од резултатот на денешните натпревари од последното 5. коло од прелиминарната фаза на Светското првенство ќе бидат дефинирани и првите четири осминафинални двојки.
Македонија како опции ги има или Словенија или Катар (одново во зависност од тоа како ќе одиграме со Австрија) и на која позиција ќе бидеме во групата „Б“. Како што размислуваме и ние, така и Словенија, која е една од можните осминафинални противници на нашиот тим, прави математики за елиминациите.
Тие денеска се соочуваат со непоразената Шпанија и се надеваат на сензација, која ќе им овозможи да ја избегнат Македонија.
„Сè уште не е готово, ние имаме амбиција да ја совладаме Шпанија“, вели Вид Кавтичник, леворакиот универзалец на словенечкиот тим.
„Сепак, ако тоа не се случи, би сакал да ја избегнеме Македонија во 1/8 финалето и да играме со Австрија. Македонија нè совлада на ЕП во Србија, имаат добар тим, а Австријците некако повеќе би ни одговарале“, вели ракометарот на Монпеље.
Со тоа се согласува и неговиот репрезентативен соиграч Горазд Шкоф.
„Австрија е во моментов можеби побрза репрезентација, но јас не би сакал за противник да ја добиеме Македонија. Македонците имаат добар тим, играат одлично на овој турнир и подобар избор за нас, секако, е Австрија. Но, не е уште готово, ние имаме натпревар со Шпанија, можеме да победиме таму и да ги промениме сите работи“, изјави голманот Шкоф, еден од најзаслужните за триумфот на Словенија над Бразил, клучен за нивниот пласман на третото место во групата до овој момент.
Едно е сигурно, без разлика каков ќе биде резултатот на дуелот меѓу Шпанија и Словенија, кои играат од 15 часот, Словенците ќе бидат целосно фокусирани и будно ќе го следат мечот меѓу Македонија и Австрија.