Надвор од терените, женскиот тенис можеби наликува на среќно друштво, со многу собирања, заеднички фотографии и дружења, меѓутоа Канаѓанката Јуџини Бушар вели дека не планира да биде пријателка со ниту една од своите ривалки.
„За мене тие се конкуренција. Знаете, не сакате да бидете многу добри пријателки со девојките на турнејата. Со повеќето од нив сум на пријателска основа и тоа е ОК, но јас сум тука да си ја завршам работата и да си одам. Најдобар начин да останам фокусирана е да нема такви пречки на теренот“, вели Бушар.
Со неа не се согласуваат повеќето тенисерки. Данката Каролине Вознијацки во четвртокот загуби од двократната шампионка Викторија Азаренка, која ја смета за блиска пријателка, додека и Серена Вилијамс е блиска пријателка со Данката.
Бушар вели дека еден од омилените филмови и е „Злобни девојки“, холивудска комедија за ривалство во американско средно училиште, но не смета дека тоа е добра претстава за животот на тениската турнеја.
„Не, воопшто не е така, многу е кул и релаксирано. Сите сме пријателски расположени и разговараме и тоа е ОК. Кога имам меч, тогаш јас сум во мојот меур и си ги работам моите работи“, вели Бушар.