„Затишје пред бура“ се наједноставните зборови со кои може да се опише актуелната ситуација во редовите на македонскиот шампион Металург. Ракометарите на тимот од Автокоманда завршија со репрезентативните обврски и веќе два дена се во Скопје, но никој од нив ништо не знае. Клубот не контактирал со нив, не се информирани кога и дали треба да се појават на тренинг, па така сите седат и чекаат.
По завршувањето на клупските ангажмани во декември, тие добија ветување дека ситуацијата во клубот ќе се стабилизира, дека платите кои им се должат ќе бидат подмирени и дека клубот ќе се врати на „здрави нозе“. Но, и сега месец дена подоцна играчите се во иста позиција, „статус-кво“ и константно чекање на конечен одговор.
Се коментираше дека стратегот на екипата, Лино Червар, вчера ќе дојде во Скопје, но остана непознато дали е тоа само нова шпекулација или хрватскиот тренер навистина ќе дојде.
А, од друга страна веќе тргна лавината шпекулации на која страна ќе фатат ракометарите на македонскиот првак. Но, прашање е дали некој ќе биде до таа мера решителен и да му ги „прости“ на клубот неисплатените плати и да продолжи на друга страна. Тоа е доволно силна причина сите да чекаат.
Неизвесноста убива, а од друга страна поттикнува сè повеќе прашања особено и поради еден друг „детаљ“, а тоа е почетокот на обврските, кои за „металурзите“ доаѓаат веќе в недела, кога треба да го пречекаат Нексе во рамките од регионалното натпреварување.
Хаотично и неславно „гаснење“ или, пак, конечно добри вести и знаци на живот е разврската која ја чекаат и ракометарите и фановите на Металург, но се чини и целата македонска ракометна јавност, со оглед на тоа дека по завршувањето на настапите на националниот тим, клубовите се тие кои го окупираат нејзиното комплетно внимание.