1 медал ѝ недостига на Франција за по вторпат да стане апсолутен ракометен првак, односно во ист момент да е олимписки, европски и светски шампион. Тоа е златото од Доха. Досега, само нив им успеала таа мисија
76 одбрани има Омејер досега и тоа е најмногу од сите голмани на првенството. Но, процентот е 36, а во таа категорија е на 5. место
15 медали од СП, ЕП и ОИ имаат Французите во своите витрини. Сега играат за 16-тиот
Натпревар за ракометни гурмани денеска е на програмата на СП. Се среќаваат двете единствено непоразени репрезентации во битка за влез во финалето. Франција против Шпанија, топла препорака од Доха да се резервира терминот за ракомет.
Ако некој на ова СП може да ја запре Франција, тогаш тоа е Шпанија. И „фуријата“ денеска ќе има улога на благ аутсајдер, меѓутоа сите кои следат ракомет, знаат какво е ривалството меѓу овие две репрезентации. Судир на две челични одбрани, луцидни напаѓачи, ракометари што играат во два правца, врвни индивидуалци. И ривалство, лично и професионално, нивните средби се мала војна, така било од времето, така е и денеска.
Франција добива предност првенствено затоа што има подобар голман. Омејер на последните две средби брани како во најдобрите денови, за рамнотежа на Шпанија и е потребен Штербик, но тој е во Скопје, а младиот Перез де Варгас иако е голем потенцијал, е прашање дали може да пружи тоа што се очекува од него на вака важен натпревар.
Откако се издигна над проблемите во тимот и конфликтот со селекторот, Франција игра како машина. Одбраната во која на централните позиции се браќата Карабатиќ им е... па може да се напише учебник по тоа како играат одбрана на последните два натпревара.
Во нападот имаат два ешалона на ракометари. Веруваме дека утре први ќе излезат Фернандез, Карабатиќ и Бараше како бекови, на линијата ќе биде Сориндо, на крилните позиции најдобрите стрелци на турнирот од нивниот табор, Мишел Гигу (29 гола) и Гијом Жоли (27).
Во вториот ешалон се Махе, Акамбре, Гребил, Њокас, Аниќ, Порт и Домула.
Најголемата предност за нив е што во полуфиналето влегуваат свежи. Имаа дуели со Аргентина и Словенија на кои ја подигаа формата и вистинското од нив го чекаме дури денеска.